Најмалку 100 загинати во израелски напад врз училиште во Појасот Газа
Во раните утрински часови за време на муслиманската молитва Фаџр, израелската армија го погодила училиштето, кое служело како засолниште за раселените лица, при што загинале најмалку 100 лица, а голем број се повредени, соопшти канцеларијата за медиуми под контрола на Хамас.
Ал Џезира, повикувајќи се на палестинската цивилна заштита, јави и дека во нападот загинале повеќе од 100 луѓе, наведувајќи дека изгореле десетици жртви. Оваа информација не можеше да се потврди независно.
Израел: Терористите беа погодени
Израелската армија соопшти дека во текот на ноќта го нападнала командниот центар на исламистичкиот Хамас во училишна зграда во градот Газа. Според нивните изјави, биле погодени терористи. Командниот центар на Хамас се наоѓал во училиште до џамијата.
Израелската армија во својата изјава на Телеграм не даде информации за жртви. Пред нападот, беше посочено, преземени се „бројни мерки“ за намалување на ризикот за цивилите, а користена е и прецизна муниција. Хамас ја користеше зградата како засолниште за терористите и командниот персонал, а од таму беа планирани и подготвувани напади врз израелските сили и државата Израел, се додава во соопштението.
Израелската армија уште еднаш нагласи дека Хамас систематски го крши меѓународното право користејќи цивилни засолништа за своите активности. Цивилното население се користи како жив штит за нивните терористички активности, се наведува, исто така.
Исламски џихад: „Ужасен масакр“
Исламски џихад, палестинска терористичка организација, веднаш реагираше. „Изборот на утринската молитва како момент за овој ужасен масакр потврдува дека непријателот имал за цел да убие што е можно повеќе цивили, вклучително и деца и постари лица. Израелската армија го користи истиот лажен изговор за напади врз училишта како и за напади при уништување на болници во Појасот Газа, соопшти оваа терористичка организација.
Војната меѓу Израел и Хамас започна по масовниот напад на Хамас и другите милитантни палестински групи врз Израел на 7 октомври 2023 година. Според израелските податоци, во таа прилика биле убиени околу 1.200 луѓе. Исто така, киднапирани се околу 250 луѓе. Како одговор, Израел оттогаш спроведува интензивни воени операции во Појасот Газа. Според Министерството за здравство под контрола на Хамас, кое не може да се потврди независно, досега се убиени речиси 39.700 луѓе.
