Ѓеорѓеску кај Такер Карлсон: Сакаа да ја започнат Третата светска војна од Романија(ВИДЕО)
Романија е многу важна стратешка точка за ЕУ во оваа ситуација, тука е најголемата база на НАТО и границата меѓу доброто и злото, ако ја затвориме таа граница ќе има мир, ако ја отвориме ќе има војна, изјави романскиот опозиционер во интервју за американскиот новинар.
„Моите постапки не претставуваат ништо друго освен несебично чувство на должност кон мојот народ, а јас сонувам за слобода и достоинство за романскиот народ“, рече опозицискиот политичар во Романија Калин Ѓеорѓеску, кој победи на претходните претседателски избори во оваа земја кои беа поништени. Нему му е забрането повторно да се кандидира.
Во интервју за американскиот новинар Такер Карлсон, тој додаде дека е одбиен поради глобалистичката мафија која го контролира овој регион како колонија, како што тој го опиша.
„Во овој регион дејствува разузнавачка група, истата која се обиде да ја уништи кампањата на американскиот претседател Доналд Трамп. Тоа беше само копи-пејст со различни теми, вклучително и лажно обвинување за странско мешање, особено се разбира руско мешање, токму како претседателот Трамп во минатото. Се разбира, немаше докази за тоа“, додаде Ѓеорѓеску.
Тој истакна дека целиот систем во Романија е 100 отсто контролиран однадвор.
Ѓеорѓеску истакна дека пред овие избори системот во земјата го контролирал поранешниот американски државен секретар Ентони Блинкен, а по доаѓањето на претседателот Доналд Трамп тие се целосно контролирани од Франција, па всушност актуелен претседател на Романија денес е претседателот на Франција, Емануел Макрон, или поточно, како што рече, Џорџ Сорос и Макрон.
Тој додава дека како претседателски кандидат бил аутсајдер и не можеле да го контролираат.
„Мојот наратив беше целосно посветен на мојот народ и на тоа како Романија може да биде независна“, рече Ѓеорѓеску.
Алармите се вклучија, истакна тој, кога го изговори зборот мир.
„Тие го вклучија алармот бидејќи им треба војна и тоа беше многу важно по првиот круг на изборите“, додаде Ѓеорѓеску, кој нагласи дека странците целосно го контролираат системот во Романија и дека сакаат да го забранат.
Тој потсети дека на почетокот на декември извојува убедлива победа на претседателските избори во Романија, но изборите беа поништени, а вториот круг незаконски и противуставно беше откажан.
„Сојузниците ги украдоа гласовите и лажно ме обвинија за руско мешање, за што сè уште нема докази до ден-денес. Ситуацијата беше иста како и со Доналд Трамп“, посочи Ѓеорѓеску.
Тој во разговор со Карлсон се осврна и на претстојните избори во мај, велејќи дека сега на дело е уште поголема измама.
„Сега немам право да учествувам во кампањата за претседател на Романија“, истакна Ѓеорѓеску, нагласувајќи дека тие најмногу се плашат од слободна Романија и дека најважното прашање е мирот, а на второ место е слободата.
Мора да развиеме мировна стратегија самоуверено и без страв, знаеме колку чини војната, но не знаеме колку чини мирот, изјави романскиот политичар.
Тој додаде дека претседателот Трамп е единствената шанса за сите да постигнат мир и враќање на демократијата, не само во САД, туку насекаде, вклучително и во Европа. Тој исто така нагласи дека целата негова кампања била насочена кон мирот, а медиумите постојано го обвинувале за тоа и поставувале прашања за војната.
На прашањето на Карлсон дали е изненаден од обвинението дека е руски агент, Ѓеорѓеску рече дека тоа не го изненади бидејќи не само што ја уништуваат демократијата, туку уништуваат и животи.
„Ова не е за демократија, туку за ослободување на луѓето. Ние немаме демократија“, нагласи Ѓеорѓеску.
Запрашан каква улога играл Ентони Блинкен во романската политика, Ѓеорѓеску рече дека сите знаат дека има странско мешање во изборите, особено од Блинкен и Макрон.
„Имаше странско мешање бидејќи не им треба слободна Романија. Морам да напоменам дека најголемата воена база на НАТО е тука, а тие сакаат да ја започнат Третата светска војна од Романија“, рече политичарот и додаде дека Романија има најдолга граница со Украина.
Романија е многу важна стратешка точка за Европската унија во оваа ситуација, стратешки е важно Макрон да започне војна, вели Ѓеорѓеску.
Тој додаде дека инсистирал дека „нивната војна“ не се води во Украина и дека Романија може да посредува за мир, но дека никој не го сака тоа.
„Тие не го сакаат тоа, тие само притискаа на војна, иако тоа не е поддржано од мнозинството романски луѓе кои мислат исто како мене“, рече Ѓеорѓеску, потсетувајќи дека имал поддршка од повеќе од 50 отсто од гласачите.
На прашањето кој е неговиот следен потег, бидејќи неговите противници очигледно сакале тој да заврши во затвор, Ѓеорѓеску рече дека тој веќе бил уапсен, но дека не се предава.
„Ако САД сакаат сојузници, вистински сојузници, треба да ги поддржат романските патриоти, а не бриселските бирократи. Уверени сме дека еден ден сè ќе си дојде на свое место“, рече Ѓеорѓеску.
Романија е најважната земја во светот денес, посочи тој, бидејќи ја претставува границата меѓу доброто и злото, како што ја нарече.
„Ако ја затвориме таа граница, таа порта, ќе има мир, ако не, ќе има војна“, додаде романскиот опозиционер.
Ова е нашата земја која не ја добивме од Брисел, туку од Бога и сакаме да ги следиме и негуваме вредностите на мирот и слободата, нагласи романскиот опозициски политичар, кој повтори дека е уверен во победата на таквиот став.
Тој нагласи дека препознава само еден доверлив партнер во светот: САД и администрацијата на Трамп-Венс, нагласувајќи дека Трамп е вистински светски лидер затоа што спасува животи, не ги испраќа луѓето во смрт.
„Се соочуваме со кршење на основните човекови права и политички прогон. Нашите гласачи, меѓу кои има и ранливи групи, се казнети со над илјада евра само за објави на социјалните мрежи. Слободата на говор е сериозно нападната и тоа воопшто не е добро“, истакна Ѓеорѓеску.
Мора да се бориме со глобалистите на глобално ниво, не можеме да прифатиме дека сме само острови на суверенитет во океанот на глобалисти, додаде тој.
„Бев обвинет дека сакам да ја извадам Романија од ЕУ и НАТО, а јас само реков дека ми се допаѓа тој сојуз, само ако им служи на народите, а не им робува. Во овој момент ние сме само држава клиент и тоа мора да заврши бидејќи ние не сме робови, ние сме слободни луѓе“, заклучи Ѓеорѓеску.
