Руте ги урива соништата на Киев: Нема да станете членка на НАТО ниту по мировните преговори
Земјите на НАТО ќе усвојат нови цели за одбрана и одвраќање на самитот во Хаг, вклучително и зајакнување на воздушната и ракетната одбрана, откри генералниот секретар на алијансата.
Генералниот секретар на НАТО Марк Руте изјави дека Украина нема да стане членка на Алијансата како резултат на мировните преговори, но дека тоа не значи дека нема да има членство на долг рок.
„Постојано изјавувавме дека Украина ќе стане членка на Алијансата и го потврдивме нејзиниот неповратен пат кон НАТО на последниот самит во Вашингтон. Никогаш не и ветивме на Украина дека ќе стане членка на НАТО во контекст на мировните преговори, но мора да направиме разлика со иднината, со она што ќе се случи на долг рок“, рече Руте, говорејќи на Економската школа во Варшава.
Дополнително, тој изјави дека земјите од НАТО на самитот во Хаг ќе усвојат нови цели за одбрана и одвраќање, вклучително и зајакнување на воздушната и ракетната одбрана.
„На самитот во Хаг, сите сојузници ќе преземат нови обврски врз основа на нови цели за противвоздушна одбрана, ракетна одбрана и ракети со долг дострел“, прецизира тој.
Руте додаде дека Европа нема алтернатива за „нуклеарниот чадор“ што го обезбедуваат САД, и затоа е важно што тие постојано изјавиле дека се „посветени и на НАТО и на трансатлантската безбедност“.
Тој претходно изјави дека Русија останува „најсериозната закана“ за Алијансата и дека во денешниот непредвидлив свет е многу важно да се зголемат трошоците за одбрана.
„Нема да заборавиме дека Русија е и останува најсериозната и директна закана за нашиот сојуз“, рече тој.
