Маск по повод апсењето на Дуров не потсетува на Првиот амандман на Уставот на САД
Американскиот технолошки магнат и сопственик на платформата Х, Илон Маск, денеска реагираше на апсењето на Павел Дуров, ко-основачот на платформата Телеграм, потсетувајќи меѓу другото и на Првиот амандман на Уставот на САД.
„Погледнете ја оваа реклама за Првиот амандман. Тоа е многу убедливо“, напиша Маск на својот X профил.
Маск вели дека медиумските извештаи и објавите на мрежата Х укажуваат на тоа дека апсењето на Дуров е поврзано со истрагата за недостиг на умереност на Телеграм, што наводно ги олеснува криминалните активности.
Дуров е приведен на аеродромот Бурж во предградието на Париз, објавија синоќа француските медиуми.
Тој беше уапсен откако со приватен авион слета на аеродромот од Азербејџан, објави францускиот канал TF1.
Француските правосудни органи сметаат дека поради недоволната соработка со истражните органи и алатките кои ги нуди платформата Телеграм, Дуров е одговорен за повеќе кривични дела.
Дуров, кој има руско и француско државјанство, треба да се појави пред истражен судија, а француските медиуми јавуваат дека денеска може да биде обвинет за низа дела како тероризам, дрога, перење пари, измама и шверц.
Руската новинска агенција ТАСС објави дека руските дипломатски претставници преземаат „итни чекори“ за да соберат повеќе информации за ситуацијата.
Дуров, чие богатство Форбс го проценува на 15,5 милијарди долари, е ко-основач на платформата Телеграм, која има речиси 900 милиони корисници.
Со близу милијарда корисници, Telegram е особено влијателен во Русија, Украина и републиките од поранешниот Советски Сојуз. Рангирана е како една од главните платформи за социјални медиуми по Facebook, YouTube, WatsApp, Instagram, TikTok и Wechat.
Веднаш по апсењето, многумина застанаа во одбрана на Дуров, па американскиот бизнисмен Илон Маск ги поддржа сите кои повикуваат на ослободување на основачот на Телеграм.
Во својата објава Маск истакна и дека верува оти луѓето во Европа наскоро ќе бидат казнети за лајкување на објави и шеги на социјалните мрежи.
„Мое мислење: во Европа во 2030 година ќе ве погубат затоа што сте лајкувале шега“, напиша Маск.
