Иран го повика Хезболах пожестоко да го гаѓа Израел и да не се ограничува на воени цели
Иран најави дека неговиот сојузник Хезболах треба да го нападне Израел „длабоко“ и да не се ограничува на воени цели, како одговор на убиството на воениот началник на либанското екстремистичко движење во близина на Бејрут.
Воениот лидер на Хезболах, Фуад Шукр, беше убиен во израелски воздушен напад врз зграда во јужните предградија на Бејрут во вторникот вечерта, во напад во кој загинаа уште шестмина, меѓу кои пет цивили.
Во говорот во четвртокот, шефот на Хезболах, Хасан Насралах вети дека ќе одговори на „агресијата“ врз упориштето на Хезболах во либанскиот главен град, предизвикувајќи стравувања од нова ескалација.
По тој напад, „предвидуваме дека Хезболах ќе избере повеќе цели и ќе удри длабоко (во Израел), објави иранската мисија во Обединетите нации, објави официјалната иранска новинска агенција.
Хезболах, сојузник на палестинскиот Хамас поддржан од Иран, речиси секојдневно разменува оган со израелската армија долж израелско-либанската граница од почетокот на војната во Газа на 7 октомври, предизвикана од невиден напад врз Израел од страна на исламистичкото движење Хамас.
„Хезболах и (израелскиот) режим почитуваа одредени линии на напад што ги премина нападот (во вторник навечер), соопшти иранската мисија.
Затоа, либанското движење нема да го ограничи својот одговор на воени цели, се додава во соопштението.
Иран и Хамас, исто така, го обвинија Израел за убиство на шефот на палестинското исламистичко движење Исмаил Ханије во средата во Техеран и ветија дека ќе возвратат.
