Алтернатива на Западот: Анкара официјално аплицираше за членство во БРИКС
Блокот БРИКС добива се поголемо геополитичко влијание во светот. Турција затоа бара да се приклучи на организацијата БРИКС со цел да создаде сојузи надвор од Западот. Анкара е разочарана и од недостатокот на напредок во пристапот на земјата во ЕУ.
Турција официјално поднесе барање за приклучување кон организацијата БРИКС. Ова го објави во понеделникот новинската агенција Блумберг , повикувајќи се на неименувани извори. Со тоа Анкара сака да го зајакне влијанието на земјата во светот и да изгради нови врски надвор од Западот.
Администрацијата на турскиот претседател Реџеп Таип Ердоган верува дека геополитичкиот центар се оддалечува од развиените земји, велат изворите.
Новите дипломатски потези имаат за цел да ги покажат аспирациите на земјата за развој на односите со сите страни на мултиполарниот свет, истовремено исполнувајќи ги своите обврски како членка на НАТО.
Се наведува дека Турција аплицирала за членство пред неколку месеци бидејќи немало напредок во процесот за влез во ЕУ, кој веќе трае деценија.
Друга причина се дипломатските тензии меѓу НАТО сојузниците предводени од САД и Анкара. Германија воведе забрана за продажба на борбени авиони „Еурофајтер Тајфун“ на Турција, на која и се потребни за модернизирање на застарените воздушни сили. Германската влада ја блокираше продажбата поради купувањето на руски системи за воздушна одбрана од Анкара.
На почетокот на годината во групата БРИКС се приклучија Иран, Обединетите Арапски Емирати, Етиопија и Египет. Оваа година Русија претседава со Конфедерацијата на држави. За следното проширување на блокот ќе се разговара во октомври на самитот на БРИКС во Казан, главниот град на Република Татарстан. Малезија, Тајланд и Азербејџан веќе ги поднесоа своите официјални апликации за членство.
Форматот БРИКС се позиционира како алтернатива на западните интуиции како што се Светската банка и Меѓународниот монетарен фонд, пишува агенцијата. Новите земји-членки би можеле да добијат финансирање и да ги прошират своите трговски односи преку пристап до банката за развој на БРИКС, нагласува Блумберг.
Според Блумберг , турската владејачка Партија на правдата и развојот (АКП) долго време ги обвинува западните држави дека ги попречуваат аспирациите на земјата за независна одбранбена индустрија и силна економија.
Ердоган го изрази и интересот на Анкара да се приклучи на Шангајската организација за соработка, која беше основана од Русија и Кина како ривалски блок на НАТО.
Проширувањето на групата БРИКС, според новинската агенција, во голема мера беше поттикнато од Пекинг, кој се обидува да ја зголеми глобалната улога на Кина со тоа што им се додворува на земјите кои традиционално биле сојузници на САД.
Турција води разговори за пристапување во ЕУ од 2005 година, но наиде на голем број пречки. Турската влада смета дека членството во БРИКС може да и помогне на земјата да ја подобри економската соработка со Русија и Кина и да стане трговски коридор меѓу ЕУ и Азија. Анкара, исто така, сака Турција да стане центар за извоз на гас од Русија и Централна Азија, напиша Блумберг .
За таа цел, владата на Ердоган се обидува да привлече инвестиции од кинески производители на електрични автомобили, кои би можеле да ја искористат царинската унија на Турција со ЕУ за да го прошират својот пристап до европскиот пазар.
